懷

進入最後倒數階段，距離完工仲有三日，感覺係「都係咁~」。

係進入新環境工作之前會有六日假期以作”援沖”之用，本來打算去轉旅行，但又真係唔想去啲”已”去過嘅地方，去遠啲，又唔夠時間，最後決定諗多無謂，因為唔想為六日輕鬆假期而換來六日煩惱(諗去邊真係好煩!)，結論係… 如果去唔成旅行就留守家園，黎一個房間大反身，一石二鳥，有野搞+有得著。

好想加張「大」嘅工作檯係間「細」嘅工作房內，好矛盾，但事在必行…………(尋日因工作關係，突然停頓，依加係第二日，續寫…)

無錯，係想加張大檯，但最大問題係空間，要度度點先可以係有限空間內放置一張好大嘅檯，在此留下一張現況嘅照片以作”惜”懷日後懷念之情。

缺

今朝又係6:45am醒咗，再咁落去應該會提早老化，老人家通常都係咁早起床…

尋晚把持不住同吖媽分享咗以上經驗… 我問:「會唔會有啲野?!」，姖話可以有啲咩? 接著又係果句「你係好明顯嘅「缺覺」，即係「缺乏睡覺」… 呢句野好好用，生咗粒痱滋、胸口多條毛、眼眉跳、感覺悶悶不樂、牙肉痛、口渴、頭髮生得快/慢、基本上一切身體機能出現些許問題，姖都會以「缺覺」黎作解釋。

再講落去，我又話不如一齊去做鑊body check吧啦~ 姖即刻變臉說道:「都話叫我驗身就等同叫你打針咁(我好驚針)，如果知道自己有毛病我會更早X!」，okay~ 我都好認同~ 屋企大大少少嘅事我都開始過問，搞吓搞吓發覺大家角色好似有啲掉轉，可能我真係未衰先老，點解~~~~?! 缺覺~缺覺~

作

撇除星期日，連續6日末到7:00am就自然醒，再咁落去好可能會自然死~

星期六晚又同友人(Pete)去睇band show -《無樂不作》，過後得知原來期間發出過「黑雨」，幸好我哋係室內! 個show話係話5:00pm開始，最終都係5:00pm開始(排隊)，成6:00pm先正式開始第一隊band嘅表演，接著以每隊玩3,4首歌嘅頻率咁玩至深夜，最後我哋都係體力不繼11:30pm就離場了~

其中一位表演者「何超」都係一如以往-「節奏感極&台風極硬」，真係搞唔清姖搞緊乜，姖係「演戲」方面就唔敢講，但音樂方面就… 話係話地下音樂姐~ 仲要係啲poster & ticket 上大大隻字「何超」以作賣點! sigh~ 仲有佢佬公… 哎~ sigh x 2~

當中有幾隊bands 都好正，好似audiotraffic、hardpack、Kolor、Tonick 等等… Keep it up!!! audiotraffic 個主音(Adrian)真係好唱得，值得一推!!!

馬

尋日完成咗我諗係最後一次嘅馬交工作旅程… 亦係唯一一次拍下成個行情嘅點滴。
首先係落船，入到去就開始拍吖拍~拍吖~ 突然被條友拍番我轉頭，實質係拍我膊頭… 「呢到唔比影相，delete咗佢… 當時係10:32am…
跟住一支箭咁標去搭的士，一陣間就到達目的地。搞完一輪，完成工作後，接著又去目的地二工作，完成後就食野，途徑點滴…

入到冰室叫咗個《滑蛋牛肉一丁》加多柸古得黎而增添咗少少睇得到的音樂元素嘅奶茶 - 我的午餐。

最後放抵一千幾百，走人~ 都話唔係咁易埋齋… sigh~

晶

都有好幾十日無打過野，無錯~ 又係呢句開場白…

尋晚去咗打波，地點係「麗晶」，其間仲撞到「呠登」&「嘴喪」(都估到)~ 打咗幾場後就到頂(適埋燈)，坐底開始吹水，本來諗住早啲返歸休息，因為都真係幾疲，但最終兩點先到家，搞下搞下就到三點先訓…

其實中學時期都經常去上址打波、流連、玩肥皂鞋、行吓坐吓吹吓… 即依加嘅”hea”! 再次重返，感覺依然無變，啲波友依然「敵意」非常，把鬼~ 可能有人會話打波無「敵意」咁打黎咪仲「把鬼」! 錯了錯了~ 打波需要嘅係「戰意」而并唔係「敵意」…

呢排做番啲運動，感覺身體協調好番少少，彈跳力亦達到接受程度(即係離地10cm度~)，閉就閉在射極都射唔番以前嘅狀態，防守就便不值一題了~ sigh~ 依加接觸少咗籃球呢樣玩意，極大原因都係因為以上兩樣閉處~