扭

希望… 終於…

絕對認為每一個人都需要擁有幾廿堆大大小小嘅「希望」，因為「希望」即係等待，直至有一日希望「終於」成為事實，咁個「希望」就會消失。

換句話說，「希望」可以話係永垂不朽，基本上諗得出個「希望」而又去實踐就可以將「希望」變成事實，可能轉眼間就會出現，可能要好多佈署後先會出現，更有好多時係不知不覺間已經出現咗連自己都未察覺得黎，最終個「希望」真係變咗「事實」，但又好似覺得唔係果樣野，但其實個「希望」又真係達到咗… 即係幻想永遠都係美麗的!

現時為止，記憶中當年有好幾個「希望」都成為咗事實，最深刻嘅當然就係第一個「希望」，當期係……… 好細個(用咗成分鍾都記唔起幾歲!)，二家姐帶我去《歡樂天地》玩，由出門至搭地鐡至太古城，成個行程都非常極之興奮，好記得當期時個太古城地鐡出口貼滿七彩繽紛嘅cold cathode，感覺真係去緊一處好過癮嘅地方~ 入到《歡樂天地》家姐都會「唱」十個代幣比我玩，玩每項遊戲大約需要一至兩個代幣，總之當期時最少都可以hea成粒幾兩粒鍾~ 好多時都會唔夠喉，不段咁”R”家姐「唱」多幾個代幣黎玩，當然，好多時姖都會就範(依加諗番都唔係好知姖點解會有錢~ 而且重要洗係一個咁嘅細佬身上，真係好感激!)，而成世仔第一個「希望」就係當時出現 - 「希望大個咗可以去「唱」一百幾廿個代幣玩爆佢!」。

今時今日《歡樂天地》已經成為歷史，但係早幾年嘅《冬季嘉年華》，我「唱」咗一百幾廿個代幣比兩個婗生玩(琛哥&珩哥)，最後發覺都係得唔到果種「終於成真了!」，可能因為果兩條友「交唔到戲」，更可能係啲代幣黎得太易，依加每件令佢地興奮起黎嘅事都真係得黎不易~

之後，更多更多嘅「希望」出現，而又係不知不覺間成為咗事實… 青少年時期好希望有個地方可以比我播自己鍾意嘅音樂同MV，最終係年幾兩年前出現咗，感覺係聽到頭都爆，成部電腦有成千首歌加成百段MV都會聽/睇到悶，因此依加去襯啲地方有背景音樂我都會「鄧」係裡面工作嘅人辛苦，NO matter 首歌有幾hit or 個Video有幾激~ 例如名服裝店內嘅Fashion Video or X-Game店內嘅MV or Tubo Jet上嘅Funny Video 等等… 仲有數之不盡大大小小建於微時嘅「希望」都有成事 OR 仍然「希望」中…

講咗咁耐係想講… 尋晚我「終於」將一個十幾廿年嘅「希望」演變成事實，我「終於」可以將一粒九唔搭八嘅《扭計骰》- Rubik's Cube搞掂咗! 真係非常興奮! 好有「終於」嘅感覺! 打從有Internet嘅出現，我就知終有一日可以完成呢個「希望」，但慢慢又發覺就算有條方都唔係話扭就扭，因為係條方裡面又有一條方，如是者感覺到「方中有方，方中又有方」，好Q多層~ 所以次次搞搞吓都會將呢個「希望」擺埋一邊，直至前兩日嘅深夜，又挑起咗條筋，對住條方，睇吓扭吓，似明非明，搞到粒骰啲顏色一半一半咁，還原後又好似搞唔番，搞搞吓又係得到大部分layer，最終又擺埋一邊…

第二日行開玩具店，買咗一個全新嘅《扭計骰》，感覺粒骰順暢啲，個腦亦會順暢啲~ 最後就係尋晚，「終於」比我搞掂咗姖，仲要係完全KO果隻，臨訓前重複玩咗兩次先訓! 實在太有滿足感， I DON’T care靠方~ 做任何事都有條方，完成與否先係現實…

最後，「希望」智慧無限，大富大貴，身體健康，合家平安!

文

「走」或「唔走」，呢排真係有點兒迷茫，好在有Marco's 回歸，同佢傾訴真係好舒服，唔似以前咁密陌生，Marco's 提供咗好多非一般嘅答案，至於有無啟發性就見仁見智了，不管佢都係得兩歲…

成年無見，感覺佢真係醒咗好多，可能因為佢乜都問一餐有關~ 回答佢嘅問題亦唔可以嘛嗚了事，否則佢會途著答案再加多個「點解」係結尾，因此我明白同佢對答嘅形式後，我開始不厭其煩咁詳盡回答佢所有嘅問題，而佢亦會粒聲唔出地聽我解釋… 直至dead air，你眼望我眼，再加句「明唔明吖?」，跟住佢就會!啤住我點頭以示明白。

香港政府成日都話「兩文三語」，而Marco's 就真係朝著呢個方向進展中，一句說話可以有「廣普英」共存，有時會聽到頭都大埋，有咁嘅結果全因佢吖媽(家姐)經常用國語同佢溝通，而佢吖爸就常用英語交流，加埋佢吖麻嘅廣東話，搞到有時聽佢講野都要用三五秒去消化… 勁係勁在佢自己係好清楚佢想表達嘅一切…

長話短說，以國家嘅口吻，總括黎講，今年嘅Marco's 係有五個「的」… 合作的、過癮的、精靈的和聽話的，但話咁快佢下星期三就走了，下次見佢都唔知咩環境，可能已經進化到「珩哥」&「琛哥」咁，進入非常青春期，週日愁眉苦臉(好多野諗&煩嘅樣)，捉人字蝨，頂到入心入肺，對一切事物視若無睹，直達忘我境界~

比

尋晚同一時間睇咗兩個電視節目“The Boy who Plays on the Buddhas of Bamiyan” & “The World’s Richest People”。

前者“The Boy who Plays on the Buddhas of Bamiyan”係講一個住係阿富汗山洞內嘅8歲小孩 - Mir Hussain。簡單黎講係因為《阿蓋達組織》毀滅咗佢嘅家園，而政府又覺得佢地未達資助嘅要求，最後成家人只好住係一個充滿塵埃嘅洞內，即係上年比《阿蓋達組織》因宗教理由而炸爆咗幾個極具歷史意義嘅大佛果度。日常生活都離不開污物、爛泥、灰塵… 導演拍底Mir Hussain成年嘅「非人生活」，當中有苦有「甜」，亦有「人性」嘅一面。
http://www.theboywhoplaysonthebuddhasofbamiyan.co.uk/about.htm

後者“The World’s Richest People”，簡單黎講係介紹一啲有錢佬嘅節目，今次主角”Crazy John”佬細 - John Ilhan。佢係短短十年就成為墨爾本流動電話行業嘅前茅分子，節目內少不了佢嘅「起源故事」，又講下佢嘅日常生活，購物情節，房屋簡介…
http://www.crazyjohns.com.au/aboutus/john-ilhan-profile.aspx

睇睇吓Mir Hussain覺得真係好Q慘，自己真係好富貴，「富貴」?! 於是就轉去睇吓John Ilhan，跟住又得自己真係好Q慘，「慘」?! 於是又轉去睇吓Mir Hussain… 就係咁我以每5分鐘轉一次台嘅頻率去睇晒呢兩個節目，一邊住山洞，一邊住豪宅、一邊飲污水，一邊飲紅酒、一邊買枝筆都唔夠錢，一邊買條珠鏈就廿幾萬、等等…等等… Contrast大到無得再大，唯一可以係佢地身上搵到相同嘅地方就係 - 「笑容」，貧不知富為何物，富不需為貧而盡責，salute to the $。

悠

好想去旅行，再咁生活落去，應該會短幾年命。係咁嘅社會下，要去一轉鬆弛嘅旅程，大前題唔係簽證或金錢，最需要嘅係「假期」，要有悠長假期先得鬆弛旅程，走馬看花就不如睇travel & living好過。

辦理悠長假期手續，先要打一封信，標題係「辭職信」。唯有辭職，別無他選，基本上要搵一間公司可以批准員工連續放兩星期假，應該仲難過中六合彩三獎，首先係要係一間提供14日年假嘅公司先… 就算真係中三獎，員工都唔好意思去申請連續放兩星期，即使咁好彩公司批假，亦即係代表其員工基本上係可有可無，唔被抄都偷笑…

當然，有人會覺得用「辭職」去換取「悠長假期」係有點兒戲，甚至「幼稚」，只求一時之快，仲細咩?!~~~ 老實講，係「仲細」。如果有機會用一年工作經驗去換取一年底消費各國旅遊，我一定簡後者! 因為我相信老咗就算有心亦唔會有力，到時回頭一想，腦海裡只會浮現「後悔」。

對一位身無分文嘅年青人黎講，「機會」即係「$」，「$」即係「十零萬」，講係咁講… 係咁嘅社會架構下，擁有「十零萬」都會拎去炒炒賣賣… 去旅行+辭職，換來嘅意見就只有「天真」同「幼稚」。

聊

一下子就黎到三月份，時間不留人，話咁快昨日都已成過去(廢話!)，又要再次撕開月曆嘅新一頁，好無聊…

到底人生有幾多時間可以稱得上為「無聊」呢? 例如啱啱係地鐡內被一位靚女打尖，心內不禁地流山一句「靚女都唔能夠話打尖就打尖，打「我」尖嘅靚女可以一下子就變成醜女!」，換句話講，係我眼中一位唔打「我」尖而又靚嘅女仕先可稱得上為真正嘅「靚女」，但如果啲靚女唔打「我」尖而又守規則地排係背後，我又點可以知道姖係一名守規則而又靚嘅一位女仕呢?! 諗到呢個位，我決定停止，因為感覺到有點「無聊」。

講到「無聊」，對我黎講寫blog都可算係一項無聊嘅行為不過… 打完無人睇，打完無人明，打完自己又唔多睇，打完自己又唔多明，咁點解仲要打?! 最有說服力嘅答案就係因為「無聊」。有時係朋友交談期間，講講下就會換黎一句:「無聊~」，其實咩先為之無聊?有人話某啲問題或答案聽起黎對件事一啲貢獻都無就為之「無聊」，咁有邊個人可以証明啲問題或答案其本身係無貢獻?!

事到如今，我對「無聊」嘅初步定義就係呢編野，他日有機會睇番，都應該會係幾無聊，咁亦等同呢編野好可能成為我日後對「無聊」嘅尺度了… 無聊!