償

今日如願以償可以「出席」林海峰talk show，實在太有滿足感了，因為一切都盡在掌握中，上個月仲打算出絕招。

最好不過就係呢兩日都係馬交，可以避晒有關talk show嘅報導，尤其係公司部收音機，日至夜都係903…

呢排「真係」忙到抽筋，起碼係精神上!搞到連「蔡琴」演唱會都錯過埋，面對住芝男婆婆真係有點兒內疚~唯有他日買番隻DVD比姖好好品嚐。

一排冇打野，個腦有堆野，奈何不出野…

啱啱lunch完畢，發覺都係冇乜野想講，所以話過份空間其實也等同沒有空間。

照

「淫照」風波橫跨成個農曆新年，搞到呢一刻都未知搞成點。

其實文字傳媒嘅瘋狂報導經已到達「失控」，雜誌封面就不在話下，至於報紙就不論有無新照片，總之係咁椅賴到呢件事都整個「A1」先，兩三張大相加幾行字就搞掂，咁搞法我諗我都可以辦報了…

當然，銷路行頭，呢個時候唔谷大個印刷量等幾時!即係文字傳媒「失控」嘅源頭其實就係廣大市民，而能夠引起市民有咁大好奇心嘅源頭就係香港明星們嘅「表面張力」，一切過度流於表面嘅引力，即係所謂嘅「形象」，一個字「假」。

將心比己，一方面好同情相中主角，要怪只好怪佢地係演藝方面確實係無乜涵(實力)，否則啲相嘅破壞力一定唔會好似依加咁。又講吓外國，嫖賭飲吹樣樣齊嘅明星大有人在，而裸露性愛照片更屬家常便飯，唔同嘅係人地有料，「嫖賭飲吹」一樣可以係形象，就算無相都一樣可以直認，而觀眾們亦愛恨分明，明星們嘅私生活只不過係「插曲」，而唔係「主打」，講到尾，有咁嘅觀眾，就有咁嘅傳媒，有咁嘅傳媒，就有咁嘅明星，循環不息，香港始終有您。

再講，報紙雜誌內容三句唔埋就「疑似」，基本上都係以古古吓黎報導，咁同外國啲小報有咩分別!?仲話咩香港大報…如果《時代雜誌》(Time)係出自香港，相信「淫照」主角一定會成為封面人物! I don’t give a XXX!

兩

今日係年廿九，今日由朝做到晚，今日未從停過手，今日同公司拎咗兩日假，今日老細走黎問:「放假可以，但係咪可以按時完成手頭上嘅工作?!」我係佢把聲嘅餘韻仲未散之時就答咗:「可以。」，連一絲眼神嘅接觸都無…

我當然有諗過度過先拎兩日假，結論係… 太唔甘心年尾都係放得果4日假，而工作按時完成於否，都係事在人為，我敢擔保係可以完成，至於質素方面就… 結果不能「寫抱單」但講真都好有信心，但大前題係一定放兩日假先!!!
........................................................................

今日係年三十，琴晚趕住去食annual dinner，打咗上面一段野黎唔設post就走咗。

今晚會食團年飯，唔知兩個「兒生」有無又大mic咗，佢地正值青春期，講真… 「好Q煩」! 我本身都係一個好煩嘅人… 但佢地比我更煩，加埋「青春期」同現今社會嘅呎度，好似青少年唔煙唔酒就代表「乖」，過份流於於表面…

想當年… 都無乜當年可言，因為我仲係青少年，無乜歷史可言。 每當見到佢地我就會發現原來十幾年前嘅自己係咁Q煩，但我好肯定一點我會比佢地好，最起碼我無Game Boy，即係佢地依加嘅勝物「PSP」。

「PSP」or 「NDS」嘅出現令到有部份人係失去咗「情節」，即係日常生活有機會遇到嘅有趣情節… 一出街雙眼就釘實個「柏力支」盒大細嘅mon，耳仔又suck住個earphone，雖然我都係suck住earphone一族，但起碼遇到突發事件(爆炸)都睇到而走到…

再講… 日常生活所遇到嘅野真係好寶貴，正所謂「可遇不可求」，如果每刻都對住啲電子野，咁以後朋友圍埋嘅「想當年」嘅情況下，就只有圍繞著電子遊戲嘅情節而唔係現實生活嘅際遇… sigh~ 再講再講… 可能有朝一日人類會進化成與電子結合，咩染色體、基因、細胞等等… 全部與電子溶合，咁講法呢批「PSP&NDS」一族就會係未來人類嘅早先，應該係話未來香港人嘅早先至真!