完

一下子就去到二零零七年度嘅最後一日，對上果幾日假期(聖誕節)都無乜好寫，又係果幾味，食、飲、笑、暈、嘔、訓… 今晚相信亦唔會有咩新奇野出現，但就點都要寫番D野以作二零零七年度嘅埋齋。

回顧二零零七，基本上都係無乜特別，展望黎緊嘅二零零八會有輕微嘅突破! 至於咩為之「突破」就有待分解啦~ 話晒呢D野都比較抽象~ 越黎越覺得對事物呈現某程度上嘅迷糊，可以講係有點兒迷失… 好與懷、高與底、快與慢、美與醜、貴與平、早與晚、等等… 等等… 以上都係比較皮毛而又緊貼著生活嘅事項，當然大可以自己為中心，一切以個人觀點去衡量所有價值，但最起碼要有一定信徒或「粉絲」嘅人物先掂檔，如果唔係換來嘅就只有一堆又一堆嘅怨氣，甚至扶幾大篤黃色唾液!

故事亦係由一些成功或被受肯定嘅人說出先更為動聽而又真實，例如: 希拉莉在屠宰場的故事、畢菲特派報紙的故事、李嘉誠穿膠花的故事、黎智英拾行李的故事、唔好講咁多… 總之算得出嘅名人都會有一個可歌可泣嘅往事，即係「起源故事」~ 任何品牌都需要有嘅一樣元素。

如果將來有朝一日比我成為一代名人或具影響力嘅人，相信我嘅故事一定可以令世人驚嘆不已，尤其更能激起一班週日乜都唔想做懶得就懶嘅人，因為我嘅故事大綱會係「乜都無做過而成為新一代名人和具影響力嘅人物」!

為咗要改變將來自己嘅「起源故事」，都係時候係二零零八年換番個波箱，始終自動波都唔係好啱自己，都係需要郁吓先有存在嘅感覺。

球

幾日前約埋兩位青春期間嘅佬友去咗睇「第十六屆超級工商盃國際籃球邀請賽」~ 個名水蛇春咁長，又「國際」又「邀請」… 實質連埋我地香港隊都係得個四隊… 搞到第十六屆都算係咁… sigh~

雖則係咁，我地都樂在其中，呢D咪興趣囉~ 其實由中學開始我地經已成日相約去睇本地籃球比賽，好大原因係本地籃球比賽好抵睇，因為當期時睇外圍賽係唔洗入場費，但就要去埋晒啲「山卡啦」室內運動場，直至去到準決賽先去番旺角麥花臣，而所需嘅門票費用都係十零廿蚊(學生非)，再同埋感覺實力比較親切 (起碼冇爆樽呢回事)。

當日球場內我地見到好多昔日港青球員，現已成為香港代表隊嘅球員，佢地個樣同身材大致上都無咩變動，係我眼中佢地都好似仲係昔日效力港青時嘅模樣，可能係大家年齡相約，睇落都唔覺大個咗…

眼見個球場細小就不在話，但連咁都爆唔到場就真係有點兒那個… 唔通係香港睇籃球比賽嘅人都比唔上睇一場「色戒」嘅觀眾?! 話晒都「第十六屆超級工商盃國際籃球邀請賽」吖! 最大問題應該係市場推廣方面，呢個比賽都係由報紙嘅一小角似電話screen咁上下大嘅格仔size內得知，往我週不時都會經過個場館，但偏偏就察覺唔到將會有「第十六屆超級工商盃國際籃球邀請賽」係場內進行…

講番當晚賽事嘅流程… 有live band & cheer squad (girls) ~ 都算係咁~ 雖則話都係中學生，就當培育佢地成為將來嘅大band & hot cheer squad 囉… 而我地香港隊都大勝對手25分，仲要得到100分，都算不住此行，keep it up! 香港籃總!

夢

今朝比一個好奇怪嘅夢搞醒，張開眼睛之時仍然對夢境依依不捨，於是合埋雙眼希望可以再投入夢香，點知真係比我再次踏上夢境，但唔夠幾分鐘就比鬧鍾聲催毀咗久未碰面嘅「求以寐夢」。

夢境內我穿著短衫短褲，可以自由地暢游天空，無錯係「暢游」… 因為我飛行嘅動作就好似游泳中嘅「蛙式」，手腳撐吓撐吓十吓十吓~ 唔可以完全平衡隨心所欲咁飛舞，但總之可以向前去，不段向前飛…

我飛過山河，穿越崖壁，大地就在胸下，眼前只有一塊一塊大少不同奇形怪狀嘅島嶼，約隱約現嘅離心力加上冷凍無污嘅清風不段咁打向我塊面，驅使我要將雙眼合埋，身軀亦開始感覺陣陣清冷，冰冷嘅短衫褲不段拍打著冷暖交集嘅身軀，睜眼一望… 原來張被經已「sir」咗落隻腳到，個人就仲係張床到…

二話不說，將被蓋上頭，緊合雙眼，夢境再次呈現… 游吓游吓，我發現有一個小島，島上有市集，我降落在人群內，旁人見怪不怪，完全無人理會我，於是我行咗入一間商鋪，店內都係賣埋啲唔等洗嘅野。 突然，眼前出現咗一盒「牌九」，盒子上嘅花紋畫得非常精緻，我問佬板價錢，佢回復道:「二佰蚊」… 「咁貴?」我答道，其實心裡都覺得好抵，心頭好乃係可遇不可求~ 再望之下，發現「牌九」旁邊有比它便大盒嘅微形「麻雀」，包裝得亦非常細緻，佬板見況隨即說道:「果套麻雀就要三百拎蚊」，聽完佬板提價我值情將手放入褲袋內打算比錢就走… 但靈機一動，想道:「拎住盒麻雀，點飛吖?!」，於是把心一橫走咗出去繼續我嘅旅程…

畫面一轉，我上咗一間三角形嘅灰色屋頂，我隨著屋頂邊嘅去水位不段咁行，突然有一位中年吖姐係我身後出現，姖好似同我爭路行咁，於是我移橫半步，踏上斜斜嘅屋頂磚塊，姖立即與我同排，但就係偏偏超越唔到我，行行吓我就彩姖都傻，我識飛~ 一飛起我望向個吖姐，我地有了一下眼神接觸，但我就點記都再記唔起姖個樣~

殺那間，眼前又出現咗一個島，島上有一好闊嘅條穚，穚底有幾堆人正在玩樂中，我飛咗埋去其中一群年輕人面前，我問佢地前面有市集果個島叫咩名，「信xx島」佢地答道，我好清楚記得個「信」字，跟住耳邊傳來一把聲:「GOOD MORNING~」，隨著電話響鬧，雙腳又回到現實嘅土地上，面對著人人享往嘅腳踏實地人生。

動

琴晚同一大班昔日書/波/佬友去咗打籃球，屈指一算都有兩三個月未做過任何類型嘅海陸空運動。

經過一晚跑跑跳跳後，加上賽後食埋個失控晚飯，足之搞到成點鐘先返到屋企，目前狀態係周身骨痛，差啲想「射波」係屋企休息番一整日…

講番轉頭，係晚飯嘅時候，因為感覺呢排個腦好似實實哋，所以嚐試咗平生以黎首碗豬腦湯，但最終都係無食咗舊豬腦，心想只係飲鬼晒碗湯就等同吸收晒啲精華~ 正!

又再講番轉頭，雖然話依加成身痛到連大力啲呼吸都好似比野壓住咁，我都決定由今日開始重返我嘅運動場，因為再咁落去感覺好似有啲廢，堂堂男子漢理應做返少少運動，如果唔係久而久之可能連海陸空以外嘅運動都厭倦埋就大檸樂!

發

下午三時三十分，目前嘅狀態係非常極之無敵眼訓，只要一合雙眼就足以訓著，接近連眨眼都可以一眨而睡，無奈又係樹返緊工，便無奈係返工無工做… 唯一可以令我消除瞌睡感嘅辦法就係打下野。

不如講吓二零零八嘅計劃… 我諗都係一如以往~ 上半年目標收購一至三間上市公司，全年目標會係三至五間，主要業務都係圍繞番能源同地產。音樂創作方面想有少少突破，古典樂同爵士樂都玩到太出神入化了，最近睇多咗京劇，所以下年度主要音樂上嘅耍樂都會係京劇。

身體方面希望第八舊腹肌會再度重現，速度方面應該可以保持番係一百米十秒零一同埋打籃球時以斧劈式扣籃黎作主要進攻模式。至於個人能力黎講，電腦層面上唔想再入侵FBI個網路，撞啱下年美國總統大選，改為入侵CIA個網路可能會比較有趣… 異性朋友方面亦唔想黎黎去去都係果廿幾三個歐美國家，希望結識到一些中東偏西嘅異性朋友。

大致上就係咁多，打晒出黎後當堂醒得一陣陣~

回

終於到咗十二月，吖媽亦終於回巢了… 琴朝家中電話由朝早至晚上響過不停，全部都係因應吖媽回巢而打黎。

星期日朝早比幾個電話聲鬧醒咗，一向個人都認為有事應該係打手提電話，而唔係屋企電話，家用電話依加最大用途只作鬧鐘之用，通常都係您熟睡時佢就會響起，一般黎講響幾下我係唔會去理佢，而每當我把心一橫走去電話旁邊打算接聽之時個電話通常都會停響，呢個亦係點解我咁唔鐘意去應付家用電話嘅原因…

但琴朝個家電好似響到失控咁，強迫著我要硬著頭皮起身去應付(接)個來電，點知一如慣常，當我將隻肉手接近個電話之時，佢又停咗~ zxy!@#~ 接著我就去咗查看手電，點知發現原來又較咗震機，而螢幕上亦顯示有幾個missed call，一睇之下全部都係Unknow來電，基本上手電一顯示unknow call都係家姐打黎，因此我亦將姖嘅電話名字set 咗叫「Unknow」~

以姖一慣嘅作風係唔會打過不停，亦因為咁我認為可能出咗啲咩事，剛巧又碰啱吖媽回巢… 於是我趕快地回咗姖一個電話，我「喂~」完之後姖就急忙咁就講出姖嘅要事，原來姖瘋狂來電係要我做一件好重要嘅事… 「煲湯」!
我十時之間真係想頂爆姖個肺! 咁趕就係叫我「煲湯」?! 仲要唔係「金寶湯」而係有骨頭個啲湯，但諗入一層… 姖真係睇得起我，可能我比姖嘅印象就係「萬能」~ 我好自然咁回咗姖一句:「煲湯?!」，跟住佢就一輪嘴咁爆晒啲做法出黎，基本上我一句聽唔落腦，只係緊記姖最後一句:「其實乜都唔洗理，掉晒啲野落去就得!」。

為咗吖媽~ 我放抵電話就走咗落街買料，返到屋企將所有料切開後就掉落個煲內加水煲吖煲~煲吖煲~ 個幾鐘後我終於將一煲水煲成半煲湯，一飲之下感覺同味覺都超越平時吖媽煲嘅湯，而我嘅第一次又再次比咗我自己先… 亦明白到點解平時唔飲吖媽煲嘅湯姖會咁無奈，因為「正」野係需要與人分享先為之有趣，而換句話說，懷事通常都係一個人受就而足夠。