飽
啱啱過咗個好飽和嘅週末，首先係星期六下午幫「梅花鹿」搬運，搞咗幾個鐘後接著就同「Peter.王」去咗睇show，依佢先前嘅說法係7:00pm開show，於是我地六點幾鐘去到目的地，食過晚飯後就走去等入場，呢一等就足足等咗個幾兩個鐘，最斜嘅係我地係場外等嘅期間白白錯過咗其中一隊band(好可能)，係第一隊band走咗出黎之際我地先醒覺原來個show經已開始咗…
入到場館後本來已經企到比較前嘅位置，但一轉band之下人群開始推撞，盤旋幾吓後就被退到後排… 講番個show啲歌其實之前一首都未聽過，而唯一嘅一首歌到呢一刻都有印象嘅係「CHOP MARK」為記念六四玩嘅COVER VERSION「血染的風彩」~ 夠晒hard-core!!!
其實基本上果晚隊隊band都表演得好hard-core… 只因場館設施有限，可以做嘅都經已做晒，一隊band最緊要比到觀眾有heart嘅感覺，係heart嘅層面上佢地可以話交足晒貨，而觀眾方面亦比足晒反應; 跳、推、撞、搖、傳、叫、舉、做得嘅都做晒，係爭未除埋個奶罩~ 如果紅館可以比觀眾們做同樣嘅行為就掂晒，但大前題係香港有冇可能容納樂隊文化，係講緊比較hard-core少少嘅band就經已足夠。
經歷咗一晚嘅耳根震動後，星期日晚接著出席澳友「S&M聯婚」晚宴，可以講嘅係「又一郎才女貌，天作之合」，席中亦碰番幾位昔日嘅書友、波友、工友同hea友… 係佢地歡天喜地嘅面容中可以見到大家都為一對新人而喜泣，成個婚宴基本上都進行得非常完美，唯一美中不足嘅係大早安排好化妝小姐會與我地同桌共膳，但最終姖都係選擇咗獨自快樂遠離群獸…
揀
一星期內似是進行咗好多野，但又似是無乜事情發生過，每日如此，每月如此，最好唔好每生也如此。
呢個幾月黎一個人食、一個人洗，一個人睇、一個人訓、一個不如一個… 星期一至六都係同一時間起床、同一時間搭同一班車、同一時間睇同一份報紙、同一時間遇同一班人、同一時間供奉比同一個禽獸(馬會)。
再咁落去我可能會成為一位真真正正嘅「個體戶」，寂寞感亦會隨身而來，那怕只有數秒~ 再講，話知您生活有幾多采多姿，寂寞感也會係多采多姿中刷過… 寂寞係唔到人去選擇，佢要來臨嘅時候就點擋都擋唔住，就好似女人嘅「無理」和男人嘅「固執」一樣。
我好抗拒選擇，因為我深信有選擇其實等於無選擇… 最終答案往往主宰係提供選擇嘅人/機構手上，佢可以比三個選擇出黎，當中有兩個係斜嘅，表面上係三揀一其實只係一揀一。又或者，有三個完美嘅選擇出現，係呢個情況下表面睇黎好似係一個完美嘅選擇方案，實質會拎到選擇者更煩，如果三個都咁好又洗乜提供選擇~ 求其比一個就足夠! 但因工作關係我又往往需要提供好多「選擇」… SIGH~
好多時人係無選擇嘅情況下反而會更快樂和得到更多收穫，試問有得揀邊個會揀地獄式嘅生活?! 即係佬肚啲講句:「未曾嚐試過地獄嘅苦況，又點知平凡原來已足夠~」。
飛
今朝早咗半個鍾起床，梳洗過後就睇咗吓即將來臨嘅presentation資料，朝早閱讀另瀉悅目~ 雖則只係果十五分鐘，但需知道朝早十五秒好比黃昏十五分。接著就走咗去食咗個醒神早餐，繼而返公司開始等待黎明的一天…
期間又接到一隻飛機，數吓手指… 發現原來真係連一雙肉手上嘅手指都唔夠數佢呢年內到底放過幾多次飛機… sigh~ 因乜解救一個人可以不斷咁對另一個人放咁多次飛機?! 呢條問題其實好值得探討，可能最啱嘅解說係-「不受尊重!」。但再諗深一層… 自己亦曾放下不少隻飛機比家姐個仔，但我敢肯定我絕對尊重佢地，只要係我有所準備去接受佢地失控態度嘅大前提之下，又或者我悶到抽筋之際就會去搵佢地打發吓時間同埋吸取吓靈感，可以咁對待佢地佳因佢地重係兩位細路，當然，吃得咸魚抵得渴，我併唔排除他日佢地會咁對番自己… 到期時大不了咪唔再相約囉~
其實約定嘅最大意義係唔想對方失約，換句話說即係重視某一種活動之下，我們就會以「約」去打做一粒藥以作定心之用，但結果得到嘅係一隻飛機~ 咁相約呢個行為簡直係得不償失，個種失望要比起當初一野被拒絕要黎得傷感十倍~ 果真「把鬼~」。答案呼之欲出… 點解會有飛機嘅出現呢?! 最緊要係有約先可失，唔約咪自然可以無約可失囉，飛機亦可一飛無回頭了… 咩尊唔尊重根本不值一提~
好
香港睇大陸好，大陸睇香港好;
忙碌睇悠閒好，悠閒睇忙碌好;
光芒睇平淡好，平淡睇光芒好;
夏季睇冬季好，冬季睇夏季好;
烈日睇雨雪好，雨雪睇烈日好;
以前睇以後好，以後睇以前好;
農村睇城市好，城市睇農村好;
大胸睇平胸好，平胸睇大胸好;
短髮睇長髮好，長髮睇短髮好;
單拖睇拍拖好，拍拖睇單拖好;
返學睇返工好，返工睇返學好;
大人睇細路好，細路睇大人好;
男士睇女士好，女士睇男士好;
西人睇唐人好，唐人睇西人好;
最後都係您睇我好，我睇您好;
橫又好直又好，斜咗就當睇唔到，睇吓自己會更好~
局
I'm turning my head up and down, but can't see the lemon tree, all that I can see is just blank and heard “everything is fine, everything is just fine~” in whisper.
I've no dreaming at all since two weeks ago, should I just concentrate on my day dreaming only?! um…I guess it is because I'm not be fond of sleeping lately or there are so many question in my head, such as there are how many trickster pass through of me everyday?!
Well, actually I don't care people tricking me as long as I don't even know it is fraud. On the other hand, please hide the truth as deeply as you can, once you decide to tricking people.
In fact, we're already living in the horrible circumstance.
天
星期天。理應訓到黃朝白晏，但我選擇咗九點起床… 因為… 無得解; 自然醒~
梳洗後就落街買咗個早餐返屋企享受並且感受一個晴朗而秋涼嘅星期天早上。早餐過後我走咗去電腦面前，心血來潮去咗VANS個網頁瞄吓，呢一瞄就瞄咗成朝~ 網頁內嘅鞋款式多就不在話下，最大原因係果到有一個新服務”CUSTOM SHOES”，即係提供一對潔白無添加嘅白鞋比客人，而顏色方面就任得您舞…
雖說只係有限範圍嘅顏色搭配，但永遠睇上黎簡單嘅野其實做落會係最複雜，捉之搞咗成粒鐘~ 最後一個步驟就係填好郵寄資料按”Confirm”，與此同時發現”Confirm”制下方有一段備註寫住:
*PLEASE NOTE: We do not ship internationally. Orders with shipping addresses located outside the United States will be cancelled. 頂爆佢個肺!!!
本打算以一個晏覺去彌補早上嘅過錯，點知”Pierre”來電話去飲荼，雖然話係飲茶黃金日，但I DON’T CARE! 最後一行四人走咗去飲荼… 去到現場”William”攞完非返黎話三兩個後就有位~ 係黃金日飲荼只需等三兩個位?! 除咗稱讚佢之外都無咩好做了。
幾分鐘後真係隨侍應走咗入去我地嘅枱位，發現係一張十幾人嘅大枱，原來係搭枱… 呢個時後除咗重打”William”就無野可以做~ 計落無十年都有八載未試過搭枱飲茶，細個經常性都會搭枱飲荼，但唔知由幾時開始唔見咗呢個行為，可能以往嘅親切街坊通通已變成現在嘅班親切嘅網民了~ SIGH~
壁
琴晚倒水飲之時，發現倒出黎嘅水以幾條線嘅形態傾出… 於是我就將水壺放平再一次將水倒出，呢次啲水以兩條分义嘅形態流出~ 搞到水花四濺成地都係水… 心諗水壺都有麻甩佬嘅問題?!
唯有自然地「隊」隻眼埋去個樽口位睇睇，唔睇由此何… 成隻鱷魚極近距離咁係我眼前，真係差啲比佢係萬聖夜嚇死!
基本上我對四腳蛇係全無反感，甚至於有啲鐘意佢，可能因為從小就聽話四腳蛇(Gecko)係益蟲，而人類所謂嘅害蟲就係佢嘅食物，例如蚊、屎蟲、蒼蠅、甚至付曱甴(最驚)… 總之一切以曱甴為敵嘅野都係我嘅佬友，雖則從黎都未見過一隻家養嘅四腳蛇個嘴會有可能咬死一隻成熟嘅曱甴，但心理上四腳蛇係以曱甴為食物已經好足夠。
講係咁講… 係清理隻四腳蛇嘅時候都好青，因為唔清楚到底佢係死咗定係定咗係「樹」，無反感為無反感~ 實情都唔想同佢有咩接觸，最好就可以用剩餘嘅水沖佢出黎，最青係將個壺蓋打開嘅時段(透明)，又唔知隻四腳蛇係生定死，如果生 - 又驚佢失控咁亂扒一通，上咗我身就大鑊，到期時就到我失控… 如果死 - 又驚佢死咗之後會好似人類咁肌肉彊硬就此吸住個壺面…
最終我以分幾次嘅形式將壺內嘅水分段地倒出，沖吓沖吓就將隻四腳蛇沖出，而佢嘅生命亦由被倒出嘅一刻證實已終結… GOD BLESS YOU!
