閒

琴日過咗一個夢寐以求嘅下午，好難可以得閒係閒日遊閒地行街再同d閒友閒談數小時，非常享受… 一個字「閒」!

得此閒情，全賴於琴晚嘅兩場球賽… 還掂都要早退，把心一橫請半日假好過~

同朋友一號(雲涕)食完個lunch後，接住就相約朋友二號(閉翳)去食tea~ 係等待佢來臨嘅同時… 走咗去「貪史」內嘅「第一頁」睇書打發時間，竟然發現原來係「英書」範圍最陰最角嘅位置係有好多關於「小把戲」嘅書籍，內容過癮之極! 就係好奇心直達頂點之際，平時熱衷遲到嘅佢來電… 「就到~」，「閒」嘅程度真係不相百眾~

tea後接著就搵埋其他好友進場，入到去「話知佢九七」講明當睇英超咁睇~ 最終睇完兩場球賽，大汗搭細汗… 直情當踢咗兩場英超~ 直至呢一刻，疲態依然~ 至於場波好睇與否… 唔重要~ 最緊要偷得此「閒」… 正!

晨

過咗今日，本大爺又會大多一歲。
屈指一算，都只不過係五字尾… 話「細」無人認為「細」，話「大」又當然未算「大」，用「唔上唔落」去形容呢個階段就至好不過肋~

友情、愛情、運程全程投入磨合期，一舉手一投足都可以影響將來嘅面貌，感覺就好似做乜都唔「靈」~ 同一句說話向唔同年齡嘅對象發表，得回來嘅反應都各有差異，「少年」會回一句「咪講埋晒啲咁嘅野啦」~ 即係「老肚」，「中年」會回一句「嘿嘿，遲啲您就明咖啦」~ 即係「幼稚」…

現況最好就係出現一位人兄可以拎自己盲目地追隨，乜都唔洗諗~ 佢話乜就乜~ 到咁上吓就會得到回報~ 咁就為之「wer le good」肋~ 相信以上都可以係我地呢堆年齡層日求夜夢嘅理想畫面，話雖如此，都係個句「理想」同「幻想」就只有一線之差，wake up~

曾經好鐘意將呢句野放係嘴邊，每當朋輩提及「乜乜」理想之際，我都會不由自主地回應「理想與幻想就只有一線之差」~ 得回來嘅就只有”death air”… 好變態~ 直至一次，個一次唔係回應(death air)，而係一句反問句「世事有咩唔係從幻想而產生嘅呢?!」，小至「草紙」大至「飛機大炮」有邊樣可以決少「幻想」兩字?! 下刪百字… 從此以後得知原來「幻想」同「理想」其實係一對孖生嬰兒，放膽去幻想，終有一日幻想可成真，到期時自然發現其「幻想」原來就係當初嘅「理想」~

獻

咁就奉獻第一次比佢…

一支箭咁「標」去場館後，搵咗十幾廿分鐘都搵唔到間出版社，最大問題係… 直情唔記得間野個名~ 為有打電話比呀「琛哥」叫佢幫助上網check check… 最後佢都係將件事比咗佢呀哥… 最後又要用十令分鐘先可以完全對啱個網址… SIGH~

去到目的地，眼見一大班暑假友，活力十足… 又有相機係咁影 (撇底好多野走去咖嘛，比人睇到d相就死硬~)… 本來諗住打退堂鼓，但最後當然堅持到底啦~ 因為有佢吖妹壓場，嘩哈哈! (講吓喱~)

最終都不往此行，mission completed~ 多謝佢嘅格言，但真係睇唔明佢個簽名隔離寫咗d乜… 貌似「93bu6」，或者係part of the sign~ 多多見諒~ =)

承

上年係咁上下嘅時間，對一位異性承諾咗件事。

現在~ 不足一年時間已感到有點兒後悔… 開始明白到要承擔起「承諾」兩字嘅人其本身一定要有種「誠信」細胞運行於體內，對於目前嘅自己~ 可以講嘅就只有「點解我要開到個頭咁大?!」。

事源於上年8月中，Marco’s 嘅出現，當期時佢一歲… 係佢未世時，我已向其母親承諾替佢整一個personal webpage，最後佢當然順利出產，而自己嘅承諾亦憑著「拖」字決… 順勢流產…

personal webpage嘅流產換黎嘅係「一年一update」，何謂「一年一update」?! 即係一年幫佢創作一段維持數秒嘅animation~ 係佢每年嘅生日update一次，直至…………………………

就係呢個問題~ 連自己都唔記得承諾要維持呢段「承諾」幾耐… 今年先係第二鑊~ SIGN… 幾時先得黎「完」。
8月將近，現已用咗幾星期時間係drawing層面上，可以形容為「十畫只有兩撇」~ 死未!!!

左

開始打籃球嘅時候，經常想把左手運用得熟練非常，咁就可以係「鬥波」期間雙臂齊飛，於是經常係「根隊」或冇波「鬥」嘅情況下都會不斷以左手不斷拍打籃球，但慢慢發覺… 籃球最重要嘅其實係「節奏感」~

早幾年有幸接觸到「結他」呢樣野~ 開頭覺得點解要用最熟練嘅右手拎”pick”(感覺比較簡單，只用作掃黎掃去)，而用比較遲鈍嘅左手去按果六條橡筋般嘅結他弦，對初學者黎講簡直係學習難度大大提高 + 學習興趣又大大提低，但慢慢發覺… 掃黎掃去只係「掃chord」嘅範疇，係「solo」嘅時候熟練嘅右手會更為有「節奏感」~

最近，好刻意運用左手去刷牙、夾餸、轉筆、揹袋、拎雜物等等… 但慢慢發覺… 此舉更為覺得失去咗生活上嘅「節奏感」~

消

從呢秒呢分呢時呢刻決定今晚開始減少消極行為，再咁落去真係會好「傷」。

成日打算平時早兩個鍾起身，跑吓步；做吓運動；食吓早餐；睇吓新聞；慢慢行去搭車返工，見到車廂人多就搭過下一班… 講係咁講… 諗係咁諗… 連鬧鐘都係咁set… 但最終每日都係不停咁拍打鬧鐘上”snooze”嘅按鈕個幾鐘先願起身。

近排晚上訓覺連窗簾都唔拉埋，好等第二朝太陽晒Q醒，最後效果當然不如理想~ 但安慰嘅係起碼每朝都仲可以睇埋個半粒鐘新聞先出街，因為其間連同梳洗行為一齊進行~ SIGH~

係呢秒呢分呢時呢刻啱啱打完呢編野而又打算post嘅同時… 疲倦嘅感覺又再次消遣，真係唔想體內藏有「越夜越有機」嘅細胞… 今晚一定要早d訓，殺一警百(夜細胞)!

中

啱啱收到個好好好消息，吖「琛哥」考入咗第一志願中學~ CONGRATULATION!!!
其實今朝睇新聞報導時話有8成學生可獲分理想中學已感到佢會係其中一份子，但不得不題佢係班內唯一一個入到果間名校，又以佢日常生活 + 學習態度黎講… 簡直係「還得神落」~

就睇佢無時無刻都同佢吖哥「打」、「爭」、「咒」、「駡」，但每當補習老師出現嘅時候，佢地就會出奇地您推我讓咁有禮推崇，唔係話要練琴(平時推都唔願練)… 就係仲有小小雜項要完成… 總之三條友(連埋個吖sir)永遠都要「彊」持數分鐘先可以開始補習…

佢幼稚園時已好有料地入咗間靚小學，事原係佢起初報嘅時候，果間咁嘅小學因「自報生」名額已滿為由唔再收生，但到咗派位當日又唔知點解自動地派咗去果間小學(唔太清楚派位制度)… 總之就好鬼死有料到~ 咁當然大前題係要有咗見得吓人嘅成績先啦~

目前狀態黎睇… 可以話係一帆風順，就以佢手頭上將會增添多一部NDS，而其本身已經有一部PSP~

NDS + PSP = 有樓有車…

盒

早前收到一封電郵，寄件者係一位久未聯絡嘅朋友。講起佢~ 最深刻印象反而係佢隻狗… 而講起隻狗~ 只要用兩個字就可以完完全全地道出其狗格嘅精髓 -「服從」。

佢話一，隻狗唔敢話二(唔好話隻狗唔識答二‧唔該~)，曾經問過佢點可以搞到隻狗咁聽話，佢嘅答案係「從細養到佢大，好自然就會聽晒你話~」，當期時我聽咗就算…(感覺好似無講過野~) ，亦無打算再追問落去，因為睇見佢隻狗就可正明一樣藏於自己心裡嘅養狗論… 「西人養狗係比唐人更勝一籌」。

不知不覺又講咗一大段九唔答八嘅野… 講番封電郵~ 主題係 “New respect for the man!”，內容係一個改編MV “A Special Christmas Box”，其中一個男主角仲要係一位「當紅炸子雞」! 而歌詞同畫面又改得過癮之極，男生們記住內裡提及果三個重要步驟，有興趣可以整番個送比心疑對象~ Cheers ~

傷

好傷吖~ 重味如此傷害過~ 傷到要記載係呢樹~ 可想而知有幾傷~ 最傷最傷嘅係依加先係三號炸~

今期良言 - 「有錢應思無錢時，莫待無錢思錢時。」

好傷吖!!!