待

一路以黎都好討厭「等」任何事物來臨嘅過程，如果話…「等」係為咗一些渴求，就真係要睇吓到底要等幾耐… 稱得上為「渴求」，更係唔係話飲罐"加士百"咁簡單... 最後到底可唔可以如願以償~ 都仲係一個未知數，所以好多時又會選擇離場，價值觀問題…

好多時都聽身邊嘅人講「時機未到，可以做嘅就只有等~ 」- 唔係話錯晒，但好肯定係「錯」! 錯係錯在「白等」，真真正正乜都唔做，諗住遲早都會到~ 其實好多野都可以係其等嘅過程中，做一些其他野去填補「等」中嘅空隙。

幼兒時，多數日子都係等待放學，因為可以見父母~ 小學時，多數日子都係等返學或小息，因為可以玩「古錢」~ 中學時，多數日子都係等放學，因為可以做校隊訓練~ 剛去留學時，多數日子都係等放假，因為「懶」~ 大學時，多數日子都係等發成績，因為有期望~ 總括黎講，一d都唔享受以上所有「等待」嘅過程，個種感覺係使擔心、使發愁、使不安寧、騷擾、折磨、撕咬、嚙碎、反覆撥弄同憂慮的… 一句講晒「討厭等待嘅過程」! 雖則如此，但今日嘅討厭，並唔代表將來亦如此~ 因為更明白到「耐性」總比「急躁」為之優越，係等待嘅期間唯一學到就係「耐性」。

好多情況下，其實可以選擇「等」或者「唔等」，然而亦有好多野係明知結果好難接受，但都係要硬著頭皮去等待姖嘅來臨，例如「生離死別」… 可以肯定無人會享受等待呢樣野黎嘅過程，更唔想感受等待身邊任何一個人嘅離別，但無奈嘅係可以做嘅就只有去「面對」…